ماں کی دعا کا اثر Maa ki Dua ka asar

 بسم اللہ الرحمن الرحیم 

ماں کی دعا کا اثر Maa ki Dua ka asar 

 سلیم ابن ایوب فرماتے ہیں ۔ میں دس برس کا تھا ۔ اور مجھ سے سورہ فاتحہ تک نہیں پڑھی جاتی تھی ، تو بعض مشائخ نے مجھ سے فرمایا کہ تو اپنی ماں سے التجا کر کہ وہ تیرے لیے قرآن اور علم کے لیے دعا کرے ، میں نے اپنے علم کے لیے دعا کرائی ،ابن سبکی فرماتے ہیں ، ماں کی دعا کا اثر ایسا ہوا کہ حضرت سلیم ابن ایوب ایسے جید عالم ہوئے کہ کوئی عالم ان کا لگا نہ کھاتا تھا ،اور وہ گویا ایسے سوار تھے کہ کوئی ان کی گرد نہ پاتا اور نشان قدم تک نہ پہنچ سکتا تھا 

(نزہۃ المجالس باب برالوالدین ص 166 ج 1)

سبق

ماں کا بہت بڑا درجہ ہے ،ماں کی دعا اپنے بچوں کے لیے دل سے نکلتی ہے ،اسی لیے بقول ع

" دل سے جو بات نکلتی ہے اثر رکھتی ہے "

ماں کی دعا مقبول ہوتی ہے سورہ فاتحہ تک نہ پڑھ سکنے والا ماں کی دعا سے جلیل القدر اور بے نظیر عالم بن گیا لیکن یہ ماں پہلے زمانہ کی ماں تھی اور آج کل کی ماڈرن مائیں تو دعائیں مانگتی ہیں کہ میرا منا بڑا ہوکر کوئی بڑا افسر بنے ، ڈی ۔ سی بنے ، تھانیدار بنے اور انگریز نظر آئے ۔ انگریزی بولے ۔ گویا میرا یہ پھول بڑا ہوکر مجھے فول سمجھے ۔ مسلمان ماں اور ماڈرن ماں کا فرق ملاحظہ فرماییے  ؎

وہ ماں تھی گھر کی دیواروں کی رونق 

یہ  ماں   بنتی  ہے  بازاروں  کی رونق 

وہ   ماں  تو   پیدا   کرتی   تھی  نمازی 

دھنی   تلوار    کا     میدان    کا  غازی 

یہ  ماں  جس  کو   کہا   جاتا  ہے  لیڈی

یہ  ماں  گر   پیدا   کرتی ہے   تو  ٹیدی

۔۔۔۔۔۔۔۔۔

(عورتوں کی حکایات ص214/ 215)

از 

کلیم الدین مرکزی طرب بہاری